民建聯立法會議員兼元朗區議會主席梁志祥，近日多次公開斥責入元朗反水客嘅示威者，「光復元朗」行動當日，佢仲坐鎮鄉公所主持大局。佢指示威者撩事鬥非，行為好似暴動咁。梁志祥喺上個月同傳媒聚會嘅時候，仲話元朗大馬路本身人流已經好多，冇水貨客都係咁。
咁即係梁志祥好支持水貨活動喇？又唔係噃。佢喺嘉湖山莊住宅大堂裏面張貼咗一張宣傳單張（圖），聲言「要求嚴打水貨活動」，又話高度關注水貨客激增對該區居民生活嘅影響。咁自相矛盾嘅？梁志祥澄清佢冇精神分裂：「我由始至終都係反對水貨活動，只係唔認同滋擾商戶同遊客嘅遊行。」明白晒，全世界都知道梁志祥嘅低調。