周日場英超大戰，利物浦就靠巴西中場菲臘比古天奴嘅金球，主場2:1險勝曼城，電視台嘅評述員方栢翹就話呢個入球靚仔過古天樂；呢個gag爛唔爛就見仁見智，不過古天奴𠵱排就真係好似古天樂咁紅，入波短片上載咗去分享網站，只不過個網站係專播四仔箒。
金球被放上鹹網任睇
古天樂喺香港有幾紅，真係唔使我求大俠介紹，淨係知道今年三部賀歲片古仔都有份做，一時做飛機師，一時做鴨仔，一時做神探，陪住大家過羊年。古天奴原本喺紅軍，風頭都及唔上前鋒史杜列治同隊長謝拉特等，不過呢排古天奴頻頻入靚波，當堂成為球隊嘅天之驕子。據報一位紅軍球迷對古天奴射破曼城嘅金球念念不忘，將條入波片段上載到色情片網站「Pornhub」，仲放落去「純下流」（Pure Filth）呢個欄目度，古天奴當堂做咗另類嘅四仔主角，不過條片好快就俾人刪走咗。
紅軍福將膺二月最佳
我求大俠唔知紅軍球迷睇古天奴踢波，同睇四仔係唔係一樣咁興奮，但起碼睇得出古天奴人氣急升。話時話古天奴對修咸頓已經入咗球靚波，仲獲PFA（英格蘭職業球員聯會）選為二月最佳球員，今季仲做埋紅軍嘅福將㖭；佢有份參與嘅三十場比賽，紅軍就贏到二十二場，勝率高達73%，相反十三場佢缺陣嘅比賽，利物浦只贏到當中六場，勝率大跌到46%，利物浦今季衝唔衝到前四位，真係靠晒呢位巴西中場嘞。
識睇，一定係睇足英台【英波Live】：
http://soccer.appledaily.com
http://bit.ly/engballlive
另外，紅軍就剛公佈二○一三至一四年球季嘅財政報告，稅前盈利有九十萬鎊（約一千萬港元）。雖然以咁大間球會，盈利數目絕對唔多，不過就係紅軍近七季以嚟首次唔使蝕本有盈利。其實古天奴呢排咁紅，不如紅軍就好似古天樂咁捧法，簽佢做藝人，除咗喺球場踢波之外，仲去埋娛樂圈發展，幫球會搵更多錢先係高章。