商界近年積極推動上市公司引入多啲女董事，實行性別多元化，而支持商界實踐企業社會責任嘅非牟利機構「社商賢匯」亦自二○○九年起統計藍籌股嘅女董事比例。佢哋噚日公佈最新報告，點名指包括煤氣（003）與東亞銀行（023）在內嘅七隻藍籌，仍然唔聽人講，六年來都未委任過女董事。
雖然話香港算係男女平等，唔少公司高層都係女性，但係上市公司董事局真係陽盛陰衰。據社商賢匯統計，全部五十隻藍籌當中，近四分三嘅董事局有至少一名女董事，全男班嘅仲有十四間。滙控（005）、領匯（823）同埋華潤電力（836）叫做有最多女董事，佔董事總人數嘅比例都係三成左右，唔算係好多。
呢個會仲點名指七間藍籌自二○○九年起從未委任女董事，佢哋多數係內地企業，香港代表就有李國寶嘅東亞，同埋四叔李兆基嘅煤氣，寶哥哥同四叔想除名嘅話，就要快啲搵人喇。