美聯物業（1200）前執董陳坤興復出兼且染紅，加入內地地產代理Q房網，擔任香港區董事總經理。呢間內地代理計劃進軍香港，諗住未來兩年在港開超過一百間分行，招聘超過二千人，實行大展拳腳咁話。
陳坤興喺美聯工作超過二十年，早幾年美聯又兵變又生意麻麻，陳坤興就喺二○一三年離開，休息超過一年，最近終於重出江湖。佢透露，新東家Q房網已經請咗超過二百人，同時落實租廿個舖，主要集中港島同九龍區，打算以高比率嘅佣金分紅吸引業界加盟，最快上半年開張。
佢舊東家、美聯董事總經理黃子華回應話，歡迎外來競爭者加入代理戰場，不過家陣個市一年都冇八萬宗成交，佢認為，新人加入「其實咪又係塘水滾塘魚」！