絕對有理由相信，財爺「做緊嘢」。
好多人都「做緊嘢」，多數唔肯認，而且做得保守，船頭驚鬼、船尾驚賊，都沒有他夠膽，張揚得來又幾漂亮，連串形象工程攻勢，facebook、selfie、自比薯片叔叔……難怪連資深記者都話：「有少少鍾意咗佢！」
不知道是誰在幕後幫財爺谷人氣，fb account不開則已，一開就高頻率出post，而且大都是啱feel、夠晒personal的軟性post，這方面的確做得很到位。
過去幾年，在不同公司聽過各位老闆不停嚷着要公關動手做社交媒體，彷彿只要開了個facebook賬戶就能俘虜萬千年輕人的心，彷彿把企業短片放上YouTube自自然然就有幾十萬人睇。Mary心諗連email都要秘書print出來看的人，怎會識搞社交媒體，等陣網民鬧幾句，你又受唔住叫我收番點算？
真的，要搞就要學財爺，放手讓後生仔搞，這邊廂在宣讀預算案，那邊廂已在出post，話雖然已是第八次做budget speech，「但仍然有一些緊張」……嘩，sweet到呢！
朋友上月訪問過財爺，說他relax到不得了，明明在趕預算案，一樣怡然自得、舉重若輕的樣子，和記者對話輕鬆坦蕩，仲成日搞笑，完全不是一般的「官」樣，朋友訪問之外問他：擔子不重嗎？你怎麼會這樣自在的？有甚麼秘訣？他想都不用想就道：「只要無欲無求，人就會自在。」
由此可以推論，財爺並非志在必得，只不過有個狀況在眼前。
儘管他當遊戲練劍，點知劍一耍，又確係幾瀟灑咁囉！
彭瑪莉
mailto:[email protected]