越來越多富二代登場！信義玻璃（868）主席李賢義噚日喺業績會後，主動向傳媒介紹佢嘅寶貝仔李聖根，仲係咁叫阿仔同傳媒交換卡片。
相對好多本港華資企業選擇將富二、三代收收埋埋，可以低調都低調處理，李賢義確實係零舍不同。
李賢義呢位公子李聖根今年三十五歲，十年前已經加入公司，過去都算低調，佢最出名就係二○○九年娶咗中國網球名將晏紫。
而李賢義另一個巴閉親家就係國務院副總理張高麗，佢另一個仔李聖潑約十四年前娶咗張高麗嘅養女張曉燕。所以話呢，李賢義喺內地富豪界入面，關係網都算唔簡單。既然係咁，佢本人當然冇咁早諗住退休喇，噚日被人問到幾時可以交棒畀阿仔，佢即刻好大反應咁話，佢今年只係六十二歲，做到七十歲都仲得呀。