范冰冰早前傳出狠飛李治廷，戀上內地演員李晨，冰冰嘅工作室否認事件，情人節冰冰仲放風話要喺上海開工，不過內地有傳媒就喺呢日，影到李晨坐凌晨機由北京飛抵上海，再坐房車兜圈想撇甩記者，最後駛入冰冰入住嘅浦東香格里拉大酒店。
李晨到咗酒店之後冇喺正門落車，提前通知酒店員工打開後門，李晨一支箭閃入酒店，內地記者喺酒店門外守候，直至十六日清晨六點幾，先見到李晨助手出現喺酒店後門，戴黑超、口罩同cap帽蒙面三寶嘅李晨，一陣風咁快閃上車朝機場方向離開，疑似結束三日兩夜嘅情人節浪漫纏綿。
怕醜枱巾遮頭
三粒鐘後，冰冰再施施然喺女助手陪同下現身酒店大堂，還好機警咁四圍贒睇吓有冇記者追訪，然後先上車走人。佢兩個雖然冇公開承認戀情，但不時喺微博玩暗交傳情，噚日冰冰喺北京出席內地劇《武媚娘傳奇》慶功，被追問緋聞時扮怕醜用枱巾遮頭，仲搬同劇過氣緋聞男友李治廷「救駕」，甚至話自己嘅男神係張庭老公「林瑞陽」，有份演出嘅李晨就缺席，唔知係咪怕人追問戀情呢！
撰文：馮仁昭
