前央視記者柴靜，聲稱自己出資拍攝霧霾紀錄片，條片一出就有過億點擊率，連帶環保股同清潔能源股大升，而家被內地投資者尊稱為「柴姐」。昨日升得最勁係燃氣股，除咗內地天然氣減價外，柴姐喺片中推介歐洲經驗，指使用天然氣可減少霧霾，亦是原因之一。
由於眾多高官在片中受訪，呢條片被視為中央能源政策風向標。有心水清觀眾發現，喺長達一百零三分鐘片中，柴靜完全冇提過一向被視為清潔能源主力軍的核能，唔通中央對核電態度有變？於是昨日風電、太陽能股隻隻大升，唯有核電股逆市疲軟。
既然柴靜有點石成金能力，內地有唔少人質疑，佢拍呢條片是否完全為咗公益。紀錄片指摘中石油、中石化把持能源業，建議打破壟斷，開放能源市場，肯定得罪唔少人。有網民質疑，條片質素咁高，又遠赴歐洲、美國攝製，肯定燃氣公司有贊助。
柴靜喺前年辭職央視，去美國生女，有內地憤青就話呢部片係「為美國利益說話」，目的是令外資能源公司進入中國。尤其片中大量使用美國太空總署衞星圖，更成為罪證。柴姐在片中有金句，「凡是環保，空氣中都是錢的味道。」估唔到市場對她的解讀，亦是一樣。
李可強