「想，我都好想好似中咗頭獎，有嘢唔使做，老細又吹我唔脹……」呢啲打工仔嘅心聲，相信好多人同八方一樣，只能想不能做，但北區幾名鄉事派區議員卻證明，偷懶唔開會亦可「日日等出糧」，無乜嘢需要緊張，榮登全港區議會缺席王嘅上水鄉委會主席侯志強更霸氣回應：「政府畀我做㗎嘛，咁佢求我做我唔做唔得㗎。」
有線電視新聞台統計今屆全港區議員過去三年開會數據，發現開會最少嘅三名區議員，由北區鄉事派包辦。因身兼鄉委會主席、以當然委員晉身區議會嘅侯志強，出席率僅四成七，唔夠一半。排第二同三嘅都係北區鄉事派嘅當然委員陳崇輝同李國鳳，前者出席率五成三、後者五成七。
蘇西智：個個都係「大哥」
雖則出席率低，但三甲懶王卻唔覺有乜問題。侯志強回應有線表明唔擔心被取消議席，「政府點會殺一個咁能幹嘅議員」，仲話開會都係做舉手機器之嘛，開咁多做咩？八方追問佢會唔會改？佢話江山仲易改，性格好難改，唔理得咁多，強調自己好多嘢搞，「你估真係淨係服侍一個區議會咩」。陳崇輝亦不以為意：「我覺得自己做得唔錯，我唔係full time（全職）」；李國鳳則話：「盡量就就，但我哋都好忙。」
𠵱家區議員月薪約為二萬五千七百蚊。八方睇過《區議會常規範本》規定，區議員因身體不適或代表區議會出席會議和活動，先可獲准缺席，否則連續四個月冇出席會被喪失議員資格，但侯、陳都試過連續四個月缺席三次會議，請假理由同區議會無關。主席蘇西智向傳媒稱，個個區議員都有頭有面，「個個都係『大哥』」，好難向議員說三道四，會研究係咪跟隨個常規範本。
李八方
mailto:[email protected]