已變成中年肥叔叔嘅四十歲荷李活影星里安納度狄卡比奧（Leonardo DiCaprio），呢排揀女伴方面嘅口味好似轉咗，以前佢不嬲都鍾意開金髮長腿美女，但係里安納度早前就同二十七歲嘅黑人女歌手Rihanna傳緋聞，上個月又俾人話幫女方搞生日派對。
傳咗咁耐，外國狗仔隊只係影過佢哋前後腳去蒲嘅相，不過，噚日終於有料到，美國娛樂網站TMZ就放咗張里安納度同Rihanna喺生日會一齊食煙嘅相，消息話佢哋其實已經搭上咗三個月，仲話Rihanna喺生日會當中成晚都纏着里安納度，但係大情聖里安納度就愛理不理，前日佢又傳睇中咗《格雷五十道色戒》（Fifty Shades of Grey）女星狄高達莊遜（Dakota Johnson）。好似里安納度咁花弗嘅男人，繼我李村姑話，Rihanna都係玩吓好喇，認真就輸了。
撰文：李村姑