人稱CCTVB嘅新聞部揸fit人袁志偉唔知係咪犯太歲，呢排內部特別多負面新聞。農曆新年後盛傳五分一港聞記者辭職，噚日又爆出民建聯前總幹事陸漢德出任編輯主任，負責本地政治新聞審稿。坊間對呢個消息反響好大，相反無記新聞部內部嘅反應就細好多。
好難變得更加差
據講陸漢德去年中同民建聯因合作問題分手，一直搵緊工，咁啱無綫新聞部七警事件主角之一周潔儀起身，識得袁志偉嘅陸漢德順勢填補周潔儀嘅位。
有無綫新聞部中人同八方講，𠵱家前線記者環境已經好惡劣，唔想古仔俾人改到面目全非，就要同上面「拗餐死」，而陸只係芸芸編緝主任其中之一，單憑一人之力好難令已經咁差嘅環境變得更加差，相信今次只係對外界產生「觀感」問題，「唔覺得佢有乜嘢好勁搞作」。
八方聽聞無綫陸續請咗幾個人填補記者空缺，暫時未見第二波離職潮，但員工士氣自七警事件後一直低沉。有新聞部行家同八方講，𠵱家最大問題係同事冇心機做嘢，有經驗嘅記者太少，「我留低，係等緊呢度幾時可以轉好啲」。