錯唔緊要，最緊要識執生，快速糾正錯誤。英超咁大盤生意，有時好睇在乜都錯，如果個個好似車帥摩連奴（圖）咁醒目，未必精采。
兩位一脈相承嘅師徒，車路士主帥摩連奴同利物浦領隊羅渣士，就係肯創新求變，成為英國球壇上周嘅大贏家。邊度跌倒，邊度起番身，車仔今季暫時最尷尬、球迷覺得最好睇嘅一場波，係快車期打到筋疲力竭，去到元旦日作客慘負熱刺3:5。當時熱刺新星哈利卡尼，徹底將車仔嘅英超鋼鐵中路防線摧毀。
事隔兩個月，兩軍再喺溫布萊嘅盃仔碰頭，戰果逆轉；摩佬唔再計錯數，比賽亦變平淡，車仔輕勝2:0。
摩佬敢再用泰利拍卡希爾組中路防守，將原已上位嘅法國小將葛特蘇馬，推前打防中；對比上次交手陣容，車仔用防守意識較強嘅拉美利斯代奧斯卡杜斯山度士踢中場，掃到對手甩轆。再次希望靠哈利卡尼做救世主嘅熱刺，喺溫布萊全隊中框攻門僅兩次，對比上次交手時嘅命中率，由七成多大跌至一成五，並錄得近五戰不勝，陷低潮期。
紅軍同熱刺一樣，上周中棄歐霸盃齊出局，呢着唔會錯，卻棄得更有價值。剛戰被睇低下打敗強敵曼城，現同第四嘅曼聯只差兩分。紅軍今季變陣嘅頻密程度，不下於紅魔戰術大師雲高爾；不過同雲帥唔同，羅渣士嘅3-5-2，或者主攻嘅3-4-3陣式，變得多嘅係人選唔係排陣，聯賽出場總分鐘逾四百五十分鐘（約踢足五場計）者，多達十九人。
紅軍今場用菲臘比古天奴同拉爾拉拿雙翼齊飛，中前場走動頻繁，防不勝防；令到輸巴塞隆拿後、堅持再踢4-4-2嘅曼城，以同一比數錄得連敗。紅軍目前勢頭係英超列強中最勁，連巴神都間中歸位，暫不宜同佢哋作對。
防中一職，始終係現代足球嘅致勝關鍵。曼城同一套戰術，上季後上封王聯賽但今季失利頻頻，主因係骨幹成員冇上季嘅form；尤以高柏尼傷後，狀態一般，令防線陷入危機。「耶耶托尼出場必勝」嘅方程式，亦喺今場俾紅軍打破，防中得費蘭甸奴，其餘中前場球員皆主攻，情況同阿仙奴近月間中用高基連，犯單一防中守波嘅老毛病一樣。曼城主帥比歷連尼同阿仙奴雲格，算老派頭，唔輕易改變固有成功一套；藍月目前聯賽失分太多，要衞冕冇退路，錯也要錯下去，波會好睇，但成績未必保持。
英超盛世，球迷必睇，那怕球證常被取笑低水平；當中艾斯特先生上周六將新特蘭嘅布朗當奧沙，判錯紅牌，事後堅持冇錯，令曼聯續踢出失色足球照贏的評論淡化了。筆者也想硬頸一次，堅持阿士東維拉易帥會有起色，今晚聯賽快車，呢支久沉中部隊，迎兩主力箭頭齊傷嘅西布朗，平手盤再追主隊維拉一次。
文：波神