財爺曾俊華上星期同班記者用自拍棍selfie，引起話題，其實成日同人自拍嘅高官，又點止財爺一個呀！八方噚日喺醫管局新春團拜，就見到人稱「民望高」嘅食物及衞生局局長高永文，成為唔少人集郵嘅對象，由年輕女公關，到成熟女醫生，個個都排隊要同高局長合照，佢仲學財爺同記者玩selfie，條隊一度排咗十幾個人㗎。
八方笑高局長係醫療界周潤發，人人爭住野生捕獲，佢就露出一副「冇你咁好氣」嘅表情。同場嘅食衞局副局長陳肇始同政治助理陳凱欣，亦被唔少團拜參加者例如係病人組織代表，爭住合照，陳肇始噚日仲專登着咗件大紅花衫，着深色衫嘅陳凱欣就唔夠陳副局搶鏡喇。
高局長噚日上台致辭時，先多謝一班前線醫護人員喺今年流感高峯期辛苦工作，又提到佢早排去公立醫院探訪，見到唔少病人要瞓喺走廊加嘅病床，多謝病人諒解。高話公立醫院醫療負擔好大，要靠公私營合作幫手分擔，佢仲話要多謝同場嘅食衞局前局長周一嶽，幫手喺醫療改革上做咗好多工作，又帶大家為周一嶽拍掌。咁識做人，唔怪得「民望高」咁受歡迎。