一如所料，或一如政府放風放料，2015/16年度財政預算案嘅特色就係派糖，派出340億元，幾乎人人有份，永不落空，當然N無人士（未夠20歲之無經常收入、住在劏房或租屋人士，俗稱N無）就有話講，因為退稅、免公屋租金、加派兩個月生果金、免差餉兩季、稅務減免等等，都唔會益到N無人士嘅嘞，之所以係咁，先至要有一個「關愛基金」嚟援助N無人士。
左丁山嘅得益就係兩萬元退稅、兩季免差餉，其他糖果唔關我事，特區政府因近年年年有盈餘，庫房水浸，糖果唔派唔安樂，為咗政治原因，梗係要派嘅，否則低民望嘅特首一定俾人鬧死，但放在總體經濟角度睇，年年派糖並非最好嘅公共政策，只係短期嘅vote-buying政策，與泰國他信（紅衫軍）當權時之惠農政策差唔多，左丁山呢派人一貫認為特區政府面對豐厚盈餘，年復一年，最佳政策就係削減稅率，刺激經濟發展，如不減稅，就應該未雨綢繆，投資於社會基建，例如興建醫院、培訓醫護人才，以應付香港人口老化這個大問題，又例如向挪威取經，每年劃撥若干盈餘作全民退休基金，交由專業基金經理管理，以備強積金不足支援基層退休生活的時候，可起輔助性作用。今年的免差餉總值已達七十億元，假設把細額差餉（例如一千元以下）退回給業主，將超過一千元的大額差餉撥作退休準備金（不是全民退休保障），十年下來，相信已可累積到五至六百億元，加上每年的投資回報，便可起到退休生活支援，必要時加派額外生果金的效用。
今年財政司司長提議成立一個「未來基金」，由財政儲備中土地基金的二千二百億元結餘劃撥。此筆基金一開始便有二千二百億元，近三百億美元，規模相當，應有相應的透明度，全交金管局秘密管理，未必是最佳方法，倒不如向挪威取經，設立一個管理獨立的「未來基金管理局」，下設若干專職基金管理人員，負責各類投資，爭取在若干規範制約下，獲得最高回報，而運作方面、投資原則方面，盡量維持透明度向公眾交代。金管局投資專才的第一要務是維護聯繫匯率，不是爭取最高回報，未來基金由獨立於金管局以外的專才管理，效果應會更好！