【維基解密之投資縮水】港視前景未明，劇集收視放緩，掌舵人王維基本打算上月復拍新劇，不過踏入三月仍未見港視有任何風吹草動。前晚王維基在灣仔會展舉行的港視周年晚會上，終於再露口風，擬定年中會開拍新劇，不過不會大放銀彈，因為資源有限。
王維基邀請了很多前港視藝人出席周年晚會，包括林嘉華、王宗堯、周家怡、黃芷晴和湯怡等，當中以湯怡的tube dress最性感，剛滿約離巢的黃美棋卻不在邀請之列。王維基在晚宴上狂派利是，被問到羊年大計，王維基說：「網購就上咗軌道，收視都唔錯，都會拍多啲劇，但係資源有限，唔可以拍二百幾個鐘嘅劇。」
黃美棋：冇收邀請
曾有消息指會開拍《選戰II》，王維基說：「《來生不做香港人》比較受歡迎，《選戰》比較政治，唔係個個都啱睇，不過都唔係只係開一套。」王生提到網購仍未收支平衡，不過，他滿有信心：「網購之前唔係好順，唔可以即日送貨，𠵱家OK喇，不過就未有錢賺，都唔會喺一年內有錢賺，預咗要run一段時間。」
據知《來》劇與《選戰》編審均暫未埋班籌備續篇，不過港視已有一些劇本在手，除了《選戰II》已有初稿，還有《復仇》、《人生盛宴》、《天網》、《一級重犯》及一部以死亡為題材的劇本。
王宗堯得悉港視年中才開劇即表示憂慮，他說：「𠵱家嘅存貨可以播到九月，如果年中先決定拍，就趕唔切。」最近王宗堯賺到錢買新車，被問到會否用來接送女仔，他說：「遲啲會有，會努力啲，𠵱家啲女仔好快畀人搶走，之前有一個幾好，食過飯，點知一個月後俾人搶走咗。」
此外，黃美棋昨晚在尖沙嘴出席有線活動，回應缺席港視周年晚會：「我同港視嘅合約喺上個月二十八號完咗，喺公司三年都出席過兩年，噚晚（前晚）都好想去，但我冇收到邀請。」會否覺得港視現實？她謂：「唔可以咁講，可能坐位有限。」之前曾傳她與黃芷晴爭寵，她強調事件跟對方冇關。
採訪：卓寶花
攝影：陳慧安
