全國政協會議今日揭幕，全國人大會議則喺五號開幕，一班港區全國政協委員同港區人大代表噚日開始啟程去北京，準備嚟緊喺京城乖乖留守至少十零日。次次上京，港區嘅人大政協最關注嘅，莫過於有冇啖好食，其實喺國家主席習近平上任提倡節約風之後，兩會期間嘅飲宴活動已經驟減，特區政府似乎都積極響應，今年唔再搞酒會。
花生友最近聽唔少會赴京嘅政協同人大代表講，今年兩會宴請活動真係靜過鬼，一啲政黨例如民建聯同經民聯，照樣搞酒會宴請大家之外，馬會都繼續請客，但同京官有關嘅飲宴活動近乎零，特首辦證實，今年停辦兩會酒會。
朝見口晚見面 冇乜損失
查實駐京辦每年兩會期間都會幫特首搞酒會，宴請北上嘅港區政協同人大代表，特首按慣例會出席。之但係，由於獲邀嘅人，嚟緊個幾星期都係喺北京朝見口晚見面，唔需要以此酒會碰頭敍舊，所以一般人都係循例去簽到碰杯，打個白鴿轉就走人，實際意義真係冇乜，難怪當聽到今年唔使去駐京辦個酒會，都覺得冇乜損失。
有政協委員話呀，中聯辦副主任殷曉靜早前喺新春茶話會，再對佢哋發出溫馨提示，包括減少應酬，所以佢哋都要多啲幫襯大會嘅飯堂，佢憶述上年會期最早去到飯堂食早餐嘅，包括前一哥鄧竟成，唔知今年有冇人早過佢？
據聞身為政協委員嘅前廉政專員湯顯明都成日喺飯堂開餐，佢噚日抵達北京，唔知佢會唔會喺飯堂開餐呢？