國產嘅卡通公仔一向唔多啱港人胃口，藍貓、喜羊羊、灰太郎不時都俾網民取笑，近日新股華夏動漫（1566）上市，就令華華認識多一款其貌不揚嘅國產卡通「憨八龜」。
呢隻膚色貼近阿凡達嘅「憨八龜」，原來一直喺內地好受歡迎，係一套五十二集嘅卡通片《憨八龜的故事》嘅主角，二○一○年仲獲得中國動畫學會提名「中國十大卡通」金鵬獎，故事主要係關於來自外太空嘅「憨八龜」到訪地球歷險，主題係環繞和諧生活同和諧關係。
呢間華夏動漫嘅業務模式有些少似迪士尼，先創作動漫角色，再開發周邊產品、拍電影、開主題樂園，甚至以虛擬偶像開演唱會，之前就幫過旗下另一隻卡通人物紫嫣喺深圳搞演唱會，概念同日本嘅虛擬女性歌手「初音未來」好似，專攻宅男市場。唔知呢隻龜會唔會喺公司掛牌嗰日去敲鑼呢？係都幾爆！