港股再上試25000關口，但內地減息都唔足以令港股突破，之後兩日就係測試恒指冇新消息之下嘅走向，未來兩日偏軟的話，或出現幾百點調整。不過，晉佳不厭其煩提多次，近期係過往四年幾以嚟恒指靠近25000關口時，氣氛最審慎嘅一次，除非突然有壞消息出現，否則好難大跌。氣氛越唔好，反而越成為吸納時機。
減息無料到，因央視前記者柴靜嘅紀錄片《穹頂之下》更震撼，五十大活躍股份中，唔少環保概念股炒起，大家又開始驚一批高耗能股份會唔會成為兩會政策受累股。《穹頂之下》內容訪問唔少高官，被認為有可能反映兩會政策風向，所以投資者唔敢睇少其效應，沽定高耗能股份。
鋼鐵、水泥、有色金屬行業，係屬於傳統高耗能行業。觀乎過往中央對付高耗能行業，主要有三種手法。第一，加快淘汰落後產能；第二，重罰違規大型企業，以達致殺雞儆猴嘅作用；第三，大幅提高環保標準，或嚴格執行徵收環保費用。不過，上述方法過往證明效果並非顯著，又或者係再做空間已經唔多。
就以徵收環保費用為例，理論上，工業生產企業嘅環保費用佔經營成本大約一成。不過，實際上，企業要交幾多環保費用，其實係同地方政府拍膊頭嘅啫，你懂的！如果中央嚴格執行，相信近年經營困難嘅內地工業難以承受，反效果唔細，可能掉番轉打擊內地經濟增長，代價不低。
鞍鋼人棄我取
晉佳估計，環保政策方面，今次兩會可做嘅有限，高耗能行業最終受沉重打擊機會唔大。至於環保、水務行業，或許會有新政策，但估計唔會提早一年訂下「十三．五」（二○一六至二○二○年）目標，數字欠奉之下，現階段難以估計仲有幾多想像空間，要博就只好追落後股。
晉佳反而覺得，短期內高耗能行業受壓嘅話，反而係低吸鋼鐵股嘅時機。內地鋼價持續受壓，但係鋼鐵股已長線橫行，業績已經轉虧為盈，由此可見鋼鐵股已經適應咗行業惡劣環境。只要鋼價有點兒反彈，業績以至股價都有好大回升空間。
鞍鋼（347）舊年開始呈現一浪高於一浪形態，股價早已反映行業衰到貼地，實行有反彈冇跌幅。相信趁《穹頂之下》負面消息之下，喺兩會期間寧願人棄我取，等消化壞消息後，反彈去七蚊其實唔難。
晉佳
http://www.facebook.com/pages/晉佳/719009541518415
本欄逢周二刊出