【尋找香港的首爾2】金秀賢嘅齊蔭頭、G-Dragon嘅眼線妝......韓星成為潮流指標，原來香港有不少男士都暗地裏跟韓風，想話潮一潮，唔止學韓男的造型、衣着、髮型，連化妝都要跟一番！記者：鄒倩婷 攝影：馮嘉文
資深造型導師Ricky去年創辦了KAZAF makeup school，主要教韓式化妝及造型班，單計化妝班，一年便開三百至四百班，學生八成是男生，最細十四歲，最大四十多歲，可見香港男生的貪靚程度有多厲害！一對一的男士韓妝班每小時學費是680元，Ricky笑指化妝學校可以年賺過百萬！點解男士都要學化妝？Ricky坦言部份學生的確是為了跟韓風，但有人是想透過改善儀容，希望能夠結識異性，亦有人是因為工作關係需要化妝。資深魔術師Yan Ho半年前找Ricky求救學化韓妝，他說，「因為做嘢需要見客，而我天生黑眼圈好大，啲朋友成日話我未瞓醒，好似吸毒咁，所以要學化妝，等自己睇落精神啲！」
教男士化妝令Ricky豬籠入水，他說最初是聽到一首歌而啟發他做這門生意，「我記得係BigBang上次回歸嘅時候，即係《Fantastic Baby》嗰時，當時見到韓國男仔嘅化妝好勁，但係做出嚟嘅效果好易接受。」所以他便開始研究如何可以讓男士化了妝，但看上去都自然，「我自己單眼皮，皮膚又夠白，啲人都話我似韓國人，咁我咪幫自己化妝嚟研究。」外界普遍認為男士化妝是「乸型」、「MK」，但Ricky則反駁是源於方法問題。他教路指男士想化得自然，要選用無色CC cream打底，畫眉的顏色要與頭髮一樣，而眼線則要畫隱形眼線，千祈不要畫上眼皮，則否會像女生。
Ricky為了推廣男士化妝，開了facebook專頁和YouTube頻道免費教學，他認為自己帶了一個男士化妝的熱潮來香港，「我見到自己個Channel好好，人數、留言，其實都嚟自世界各地好多唔同嘅地方，大家都對男仔化妝嘅教學開始接受，我覺得呢個係我一個小小成功嘅地方囉！」
《韓流小貼士》
Ricky覺得韓男是超級愛美，他說曾去過韓國一個水上樂園的更衣室，發現有提供BB Cream、眉筆、髮泥和噴髮膠，讓男士們可以化完妝才離開，可想而知韓國男生有多愛美！