金管局上星期忽然出辣招，身邊唔少努力儲錢多年嘅朋友，都勁呻而家上車夢碎。好多人會問，其實四百萬樓下首置仲有九成按揭，何解大家反應咁大？
大家要知買得四、五百萬樓嘅上車客，好多時錢都係剛剛夠。今次收緊按揭後，呢批人會有一班轉買三、四百萬樓，呢個價位嘅樓因此炒貴。另外，九成按嘅壓力測試更嚴，由原本五成降到去四成半，原本入息兩萬，就可以九成按買月供一萬嘅樓，但而家情況，你份糧要加11%先做到，普通打工仔邊度得來無啦啦加11%人工？所以如此一來，好多人買轉租，細價樓於租金帶動下，再推高樓價。今次政府新招下，反映政府技窮，明知搞唔掂樓價，就索性擺明阻上車客入市，令成交冰封住先，但細價樓理論上係有升冇跌。
環保概念繼續成為大市炒作主題。今日兩會開幕，如果有任何利好消息公佈，小心相關股會見光死。另外，殼股仍然有得玩，噚日盈進（1386）急升15.5%，聽名你未必知佢做乜，但其實佢就係Walker Shop母公司。公司二○○八年都仲賺錢，但嗰年前主席洪文藝突然過身，公司就由佢老婆陳美雙接手。自此之後，都係蝕錢收場。好在嘅係，公司冇乜負債，市值啱啱到殼價4.17億元，靚殼一隻。股價炒起，唔係炒賣殼，仲可以炒乜？
Fifi
http://www.facebook.com/lovefrystock
本欄逢周二、四刊出