用標準發音寶安圍頭話，亦即元朗土話說來特別過癮、動聽：「你發懵定係發病？望？望你阿奶生雞仔蛇？唔曾見過婦娘時？……」
華娘（即華嫂、吾鄉經常排長龍冰室主持人）笑住跟我們說她走過元朗福德街、許留山老店對出小公園尷尬經驗的回應。
不單止華嫂，我家姑姐十年前，當時60多歲，也曾在附近位置，即元朗郵政局（元朗戲院）旁用雨傘拍打指駡七十幾八十歲淫蟲；「個死仆街，行埋嚟擠眉弄眼，單住隻眼問我幾多錢？定定神，先搞清楚個死佬想叫雞，當我係北婆！」
堂家姐美雲話知：元朗郵政局一圈；福德街、壽富街、同樂街等六街，淫業繁忙馬伕加雞人數擴張，淫賤區域去到水車館街並小公園甚至大坑渠對面喜利商場。
挾死蟻（D杯胸插雲頂穿背心，事業線挾死蟻）北姐、北姑、甚至北婆多年盤據，是誰人都知的事實，着實元朗一道風景線，頗受區內阿公、阿伯歡迎，幾廿歲冇火出？大可過手癮。
計鄉紳話法：「元朗啲商鋪因水貨生意而升值，租金高至沒法擋，啲業主人人稱慶，行出街不知幾多人多謝我地班兄弟……」
如此繁榮，唔拒娼盛；不如上述六街樹立淫賤牌坊，反正政府資助香港各區建築特色牌坊、Icon，區議會大可申請撥款，牌坊之外；大大個比人高彩膠精製拖喼，另加同樣高過人頭七彩雞樹立顯眼位置以示有益社區，表達謝意。
牌坊橫額：掂過碌蔗；左：淫婆淫姑元亦樂；右：賤公賤伯朗而康
非常體諒梁志祥議員左右做人難的位置，敬告不論在下發出多少反對聲音，完全發自深愛這個生於斯、長於斯之元朗。從來尊敬梁議員；絕對支持！區議會下面人馬功課做得未足，請吩咐，務必不斷清楚轉告，免百忙的你顧萬漏一。「光復元朗反水貨客」3月1號行動，在下撰稿〈好心施捨條路行吓啦〉之前，毫不知情，純因長期穿越元朗街頭慨嘆行路難、愈來愈難，一名蟻民有感而發而已。