英超球證呢排成日上頭條，繼馬田艾堅遜喺前個周六「發雞盲」，冇將出收山腳嘅般尼前鋒艾殊利班尼斯趕出場後，上周六輪到另外兩個球證艾斯特同史華比克；前者趕錯新特蘭後衞布朗出場，後者就冇向令史篤城中場艾利蘭隻腳縫咗十幾針嘅侯城後衞美羅費古羅亞畀牌。再係咁，睇怕英超要引入外援球證至掂。
仲記得班尼斯喺前周六般尼作客逼和車仔1:1場英超，一腳踩落尼曼查馬迪上五吋下五吋，好彩冇受傷嘅馬迪因為嬲爆郁手打班尼斯而俾球證馬田艾堅遜趕出場，諷刺係班尼斯連黃牌都冇。事隔一周，英超球證又出醜，艾斯特喺曼聯主場贏新特蘭2:0場英超睇錯嘢，明明係奧沙喺禁區內拉跌法卡奧，但就睇錯係布朗，將兩位倒戈球員撈亂晒；結果布朗做咗替死鬼食紅牌，益埋朗尼射入十二碼開紀錄。
解畫「當時兩個人犯規」
新特蘭主帥普耶賽後梗係狂插艾斯特：「球證同我哋解釋當時有兩個人犯規，一個係奧沙，另一個係布朗；佢話吹罰布朗犯規，所以就畀紅牌布朗。但我睇咗重播，布朗掂唔到任何人，我真係唔知佢睇到啲乜。」由於艾斯特冇認誤判，若然「黑貓」上訴成功，布朗張紅牌唔會轉落奧沙身上，換言之兩個都唔使停賽。
至於呢場梅開二度嘅朗尼，今季聯賽累積入咗十球，成為英超史上首個連續十一季攻入十球或以上嘅球員，賽後自然心情大靚，仲同老婆高蓮拍住拖睇Lionel Richie演唱會㖭。
除咗艾斯特，同日仲有執法史篤城對侯城嘅球證史華比克發雞盲。艾利蘭完半場前俾費古羅亞踢中小腿，被迫退下火線，仲縫咗超過十針（右圖），料要至少養傷三周，但費古羅亞居然乜牌都冇。
侯城兵收山腳又走甩
史篤城領隊曉士事後好唔滿意咁話：「踢艾利蘭嘅人應該攞紅牌，佢呢個攔截咁兇狠，我唔知點解球證同旁證竟然都睇唔到囉。呢腳足以令艾利蘭收山，點解球證唔畀紅牌，我真係唔知。」史篤城最後憑高治頂入致勝球贏1:0，佢亦以四十六球追平名宿舒利亞嘅英超頭槌入球紀錄。
識睇，一定係睇足英台【英波Live】：
http://soccer.appledaily.com
http://bit.ly/engballlive