吳君如跟王菀之（Ivana）主演的賀歲電影《12金鴨》，前日衝破二千萬票房，在四部華語片中票房成績暫時排行第二位，可以算是有交代。前日君如跟Ivana到觀塘一戲院謝票及與觀眾見面，君如半開玩笑表示以Ivana目前身形，可以開拍一部「12麒麟」，大玩早前出席車公廟求籤活動時，被麒麟撞到飛起的立法會議員葉劉淑儀。
禁Ivana減肥
剛從美國旅行返港的君如透露，現在仍然受時差影響，非常疲倦，在講到拍攝《12金鴨》時的苦與樂，她表示每日都要花不少時間黐鬚根同喉核，又大讚Ivana做得很好之餘身材亦很好，君如說：「拍戲嗰時見到佢包米真係好大，真係唔想佢減肥，減完之後就好似我咁乜都冇。」
因為在《12金鴨》片中，君如要反串扮演男人，被問到明年金像獎到底提名男主角還是女主角時，她說：「我都唔知，應該都係女主角，但角色係男仔。但我就想王菀之拎最佳女主角。」Ivana聽到後即笑言下半生要靠君如，雖然男友Eric So未有嫌棄，但Ivana自覺太肥，要為出席下月舉行的香港電影金像獎頒獎禮減肥，她說：「之前謝票嘅時候，有觀眾話我好肥，好專業。𠵱家要為咗四月嘅金像獎減肥，因為要着禮服，至少塊面要減啲。」
君如則游說Ivana不要減肥，因為可以找她拍新戲，戲名就叫「12麒麟」，君如說：「我都仲諗緊，拍『12麒麟』動作片。佢係撞人嗰個啦，設計一個俾人撞嘅角色畀佢撞，王菀之真係唔好減肥。」
採訪：王連連
攝影：陳慧安