剛周三谷草爆到阿媽都唔認得，呢日跑番沙田，早段賽果卻熱過熱狗。第四場四班千二米賣大包，由三匹熱門包辦三重彩，順序一至三名係大熱「又襟又準」、第三熱「保羅威威」同第四熱「電訊波士」，稍為失望嘅係次熱「馬明德」姍姍來遲影相跑第五，否則前四名就會開最熱四駒，結果呢場第四名最終由半冷門「翡翠寶寶」拎到，四重彩派9,321元。
「又襟又準」馬主高叔平博士家族代理瑞士英納格錶生意，近年搵女神楊冪做代言人，一洗品牌較老嘅形象。而此駒一直韋達騎開，曾經連續兩場非冠即亞，但上仗突然走樣，在韋達胯下輸到無影無蹤，呢次換上田泰安照被捧成大熱，鞍上人亦交足功課，拉士力鬥「保羅威威」影相險勝，結果「又襟又準」收復失地取得今季第二捷，亦助第二場已贏「京城珍寶」之蘇偉賢起孖，馬房連續兩戰贏馬，羊年當旺。相反「保羅威威」即使換上近期手風最順之柏寶，都係贏唔到。