上月又發盈喜嘅耀才（1428）噚日按慣例趁春節請客睇戲，有意賣走Magnum（2080）嘅主席葉茂林以一身潮look現身，心情大好咁話，自覺年紀大，兼顧唔到兩盤生意，覺得「大仔」耀才先係大茶飯，所以決定放棄Magnum。
六十三歲嘅葉茂林噚日以粉紅色恤衫配白色西裝褸、襯牛仔褲出現，表現活力充沛，仲要春風滿面，被問到點解賣仔就即刻認老，話眼見中港股市互聯互通後，耀才生意「多到澎澎聲」所以想賣走Magnum，集中火力發展，希望耀才三年後做內地華資行一哥。
葉茂林透露，潛在買家唔少，但由於「我哋開天價，佢哋還地價」，所以仲要傾，好在「𠵱家啲殼好值錢」，佢相信最終可以善價而沽。佢仲睇中小額貸款利潤高，將來賣走Magnum套現一大筆之後，除咗放啲錢落耀才，唔排除會做埋「財仔」喎！