唔知雷神好彩抑或李寶利冥頑不靈，第九場三班千二米，雷神騎蔡廐「活力寶」拉士走外叠，寧願蝕位都要望空衝，結果呢匹四歲馬順利重響勝鼓，田草B加2跑道錄得三戰全勝，成為蔡廐今季首匹四捷馬。
反觀李寶利騎蘇廐「點解」冇吸取自己第七場「將男」、第八場「天笑」末段塞車只得第三、第二名飲恨之教訓，呢場直路又走中檔受困冇位出，返嚟追唔切輸少少畀「活力寶」，「點解」三連勝夢碎做二奶，投蘇廐後首度落敗，呢位意大利騎師連續三場走死位輸win跑位置，睇到馬迷眼都冤！
賽後不少馬迷滿腹牢騷，對李寶利口噏噏手指指，李寶利似乎唔服氣反唇相稽，大聲叫馬迷Shut up收聲。今場跑第三係128倍全場次冷之「威威寶貝」，薛寶力炮製大冷P，可惜佢羊年仲未開糊，第四名係「萬事欣」，啡燈熱門「有得威」只得第五，輸到落飛黨暈陀陀！
「活力寶」馬主林子雲醫生表示，馬兒上仗排十二位，沿途走外疊無遮擋，跑不出應有的水準，今仗八檔稍好，莫雷拉亦跑得很好，一早找到遮擋，成功補中，希望牠繼續進步，估計上二班負輕磅亦有一爭之力。