喺一九八二年晉身得第一屆新秀歌唱決賽十五強，唔會有人質疑民政事務局前常秘楊立門嘅唱歌水平啩。當年佢喺鐵飯碗同金咪之間揀咗前者，勢估唔到退休之後反而圓到歌星夢，本月十六日喺中環大會堂開慈善個唱，仲獲星級監製趙增熹幫拖，為佢打造呢場《AO巨聲》處男騷。
去年中提早退休嘅Raymond向為唱得之人，偶爾會幫唔同機構唱歌籌款，首次擔大旗開騷，十六號則係第一次。點解搵到趙增熹擔任音樂總監？Raymond向八方解謎，話有次幫一個NGO唱歌籌款，趙增熹聽完後私下搵過佢幫手唱demo，兩人因此結下音樂緣。對方早前答應幫佢搞音樂會，齊幫健康快車籌款。
唔做男版G.E.M
八方聽聞C AllStar同陳秋霞都係嘉賓；至於Raymond，唔好期望佢係男版G.E.M，事關佢講明當晚「唔會嗌、唔會爆咪、亦唔會勁高音」，最重要有音有韻有感情，平實而唔會跳舞，預告會唱鄧麗君名曲。
大家唔使擔心Raymond初踏台板會緊張，因為佢除咗參加過新秀，亦喺中學時組隊參加校際歌唱比賽，摘下冠軍，之後中六組隊參加公開賽，「決賽時無綫都有直播，司儀仲係周潤發同繆騫人，仲係喺利舞台搞，當時（個台）轉我哋出嚟㗎」。
Raymond話慶幸當年放棄星夢入咗政府，自稱「我唔係食娛樂圈飯嘅料子，要迎合市民、又要扮鬼扮馬，嗰時港大畢業生好巴閉，真係放唔低身段㗎」。早前佢因為見到佔領運動令社會撕裂，包辦曲詞創作《再牽的手》放上YouTube，嚟緊佢想作多幾首歌，向創作人之路進發咁噃。
李八方
mailto:[email protected]