呢幾日新年期間，唔少朋友都會周圍拜年，自不然會影好多大合照留念。幾個用iPhone嘅朋友，都同費清分享一個得意現象，就係iPhone相簿原來偷偷地幫香港一啲地方改咗名。
iPhone相簿，係可以地圖上顯示照片，只要點按「年份」、「選集」或「時刻」下方嘅位置標題，就可以喺地圖上檢視照片嘅拍攝位置。
#相鄰地名合二為一
不過，部份用家發現iPhone顯示嘅拍攝位置，有一啲奇怪嘅名，例如喺將軍澳維景灣畔影嘅相，顯示嘅位置並唔係「維景灣畔」或者「維景」，而係「維都」（圖）。另外，喺將軍澳中心影嘅相，就顯示喺「澳唐」。
費清都好頴頭，維都究意係咩地方？Google map都冇。不過，如果打開地圖，就會見到維景灣畔附近就係都會噔，可能維都即係呢兩個屋苑，費清去都會噔影過一張相，都係顯示喺「維都」。同一道理，喺將軍澳中心，附近就有唐明苑，可能澳唐就係咁解。
不過，同事Icy就喺香港仔福群大廈影咗一張相，地點顯示就係「石漁」，「都冇個福字，又冇個群字喎」。費清問過幾個手機專家，大家都不得其解，睇怕同嗰條藍黑、白金裙一樣，又係一個謎。
費清 ＃要生計，也要生活 ＃毋忘初衷