新鴻基地產（016）大股東郭炳江位公子郭基煇（Adam）似乎越來越活躍喎。佢上星期五以執行董事身份第一次出席新地業績會，準備十足，有問必答，處女show嘅表現算係唔錯。噚日佢又再次出動，同班小朋友跟百多名基層長者慶新春、食盆菜。
聞說Adam細細個就有跟住阿爸周圍去做義工，新近佢就發起一個叫做「方舟小醫生」嘅長者關懷計劃，今年目標係招募三百名兒童做小醫生，透過定期到訪多間老人院同埋不同活動為長者送暖。噚日係呢個活動啟動禮，三十一歲嘅Adam着埋綿襖出席，誠意十足。
老實講，隨住各大華資企業嘅二、三代開始上位，財經界𠵱家都幾八卦呢班人嘅表現。由於佢哋大部份都係學緊接班，老一輩仍指揮大局，公司業績表現未必直接關佢哋事，想孖屐了解佢哋多啲，搞慈善、藝術、飲食生意似乎係最直接嘅方法嘞。