央視前一姐記者柴靜，辭職一年後自己出資拍攝霧霾紀錄片，二月二十八日免費網絡播放。內地經濟學者馬光遠評論，「今天最重大事件，不是人行減息，而是柴靜拍攝的霧霾紀錄片在網絡上瘋播！」單單首日，該片網絡播放量已超過五千萬，霧霾成為上個周末微信、微博最火爆話題。
冇咗央視官媒身份的限制，柴靜呢套長達一百分鐘紀錄片暢所欲言，由佢剛出世女兒患腫瘤講起，話「這是我和霧霾的一場私人恩怨」，揭發內地空氣污染情況驚心動魄。柴靜喺內地粉絲極多，選擇在兩會前夕播放，自然想取得最大政策影響效果。已經有內地券商出報告，推薦受惠治理霧霾商機的「柴靜概念股」。
根據呢套片所講，中國霧霾嚴重，主要是過度使用劣質煤油，但由於受到能源壟斷國企阻擾，無法徹底治理，亦無法好似西方國家咁使用天然氣等清潔能源，矛頭直指中石油、中石化。柴靜喺片中訪問咗多位內地環保專家，以及環保部、人大、發改委高官，其中以剛卸任的發改委副主任解振華最具份量，佢話「能源體制改革最關鍵。」意味柴靜上述觀點，亦得到部份官方人士支持。睇怕中石油、中石化喺兩會將再成箭靶，有排頭痕。
李可強