鬍鬚曾被稱為「品客叔叔」，源於網民發現佢個樣似足品客薯片個商標，惡搞之後連陳家強都話似。自預算案發表後，大家對品客叔叔的感覺也好起來，佢開fb、同記者玩自拍、借奧斯卡論政，反應正面，而今年份預算案評分有六十以上，也是近五年最高。如果同樣宣傳動作出自689之手，恐怕就已被人批評至體無完膚。政治，就是對人不對事，表面睇關乎施政，但更大程度是關乎群眾的觀感。
曾俊華政務官出身，曾任彭定康港督秘書，董建華年代首批問責官員，出任工商科技局局長，曾蔭權年代出任特首辦主任、07年出任財政司至今，在梁振英任內民望超越「好打得」之政務司司長林鄭月娥。政圈中人一直對佢冇乜極端評價，由泛民至建制派，商會至工會，都有得傾，人緣好。有評論認為佢之所以民望高，係因為689實在太差，市民將對政治人物的盼望投射在他身上所至，好似大家將施政報告及財政預算案中對佔領行動及年輕人的批評作比較，便見到一個就「左」毒上腦，殺氣騰騰，一個輕描淡寫、走中庸之道。
但689差唔代表其他人一定好，反而容易因為佢行事極端受拖累，一齊沉船，律政司司長袁國強便是一例，佢自己冇底氣，言論又冇水平，同上手𤏸仁龍差天共地。曾俊華是現政府內有港英政務官智慧及手腕之人，大家或者認為林鄭月娥先至代表政務官精英，非也。傳統政務官中，視為精英而獲重用者有兩款，一款是好打得，硬淨，絕無打斧頭，死砌死做、身水身汗之戰鬥型機械人，代表人物是林鄭、葉劉、羅范呢一類。但同時有另一款屬綿裏針，遊刃有餘，成日笑騎騎，絕對唔會畀公眾見到身水身汗，表面睇好似幾Hea，陳祖澤、孫明揚、許仕仁就係呢款。
公眾本來係接受好打得一款，尤其在肥彭管治後期，但當呢種硬梆梆人士面對九七後複雜之政治環境，就容易露底，心口得個勇字，政治技巧不足。好似昔日葉劉推廿三條，今日羅范幫689推創新科技局，都係四圍撩交打，論述能力又低，成事不足敗事有餘。曾俊華這種綿裏針，反而可以應付複雜政局。在舊政務官眼中，政治角力從來都不是你死我活，在立法局Panel、財委會剛砌完開大片，轉個頭在前廳又搭晒膊頭飲咖啡，唔會用政治去劃線搞臭對方，而是以「目標為本」的deal maker，所以即使在九一直選後面對民主派及民意衝擊，也一樣維持有效管治及穩定。大家細心睇睇，當689以鬥爭為綱，禁止官員出席民主黨黨慶，曾俊華就去社民連阿牛娶新抱晚宴表態，上次諮詢會被示威者雞蛋擊中，曾處之泰然仲講笑話，689則殺氣騰騰，甚至出現公開阻止曾發表個人感受的失態舉動。香港政治圈好細，如果凡事政治掛帥，最終只有自我孤立。
市民厭惡政府小學雞式政治鬥爭，對盲目照搬內地一套心感不滿，因此代表中庸之道者自然會得到支持，曾俊華是最後一位有實權而又深明香港政治操作之人，但觀乎今日政治黑手橫行，對付異己，若他被視為689連任最大障礙時，這兩年恐怕並不易捱，品客叔叔民望越高越凶險，唔知今次有冇智慧去化解。
添馬男