對於買咗樓嘅人嚟講，樓市加辣，最想第一個多謝嘅人，就係金融局總裁陳德霖。 喺所有辣招都未有之前，即係曾蔭權出招之前，買樓唔係一件咁特別嘅事，人人都可以做，只要有份工、有首期，銀行好肯借，政府政策都傾向想你買樓，甚至畀你九成半買，因為嗰時經濟麻麻。
辣招越出越多，雖然一路都係打正旗號管理需求，即係唔歡迎買家，礙於政治壓力，自住第一層都冇大變動，頂多唔畀你借九成半。甚至乎好多人批鬥過陳德霖一句話：六百萬樓下係上車盤。高明曾經認為呢句話係出於善意，因為上車監管向來偏鬆，上車定義越高，上車客選擇越多。
最新一輪收緊按揭後，政府發出訊息，就係冇錢唔好學人買樓，又或者咁講：點樣有首期買第一層呢？就係你賣咗層樓，先至有首期去買樓，咁冇樓賣點買樓？當買樓唔係一般人可做到，只有業主先參加到嘅物業買賣，業主就係特權階級。
未買嘅話，門檻再提高，心理打擊更緊要，放棄買樓會成為主流，儲得咁辛苦買屯門天水圍細樓，不如使晒啲錢，直接租間dream house，一嚐曾經擁有滋味。若果樓價再升，每月交租頂唔順，住一年半載由天堂又跌番落地獄，將會唔只仇視「地產霸權」，連一啲小業主階級都會係鬥爭敵人。如果冇金融危機進行財富洗牌，社會階級撕裂會更嚴重，過去半年藍黃絲只係小事，之後有冇樓階級矛盾會更明顯。
投機性買環球信貸
但係不排除有少部份人心未死，拒絕認命，繼而向財仔借錢，或叫廿四孝老竇向財仔借錢買樓，上次因為細價樓四按爆破論而炒上嘅環球信貸（1669），有機會再因此而炒多轉，建議今日開市純綷投機性買入，博市場憧憬父母按樓幫仔女做首期概念，有效期兩日，唔得就閃。
最後，人行減息，相信今日會爆升一轉，捱唔捱到一日難講，但之前講過兩會期間例跌，今次仲有人行減息東風炒上，兩會憧憬更高，只要兩會實際消息勁唔過減息，市場一定會失望，而高明多次強調，中國國情係見真章即死，兩會一定冇料到，對股市冇幫助，更加唔會有阿爺一定會頂住呢支歌仔，今年兩會個市跌硬，之前儲埋成手內險、內銀、A股ETF、鐵路股等前當炒股，建議今明兩日盡沽，清倉離場，等跌過千點先買番。
高明
http://www.facebook.com/BigRiceTea
本欄逢周一刊出