美國聯儲局主席耶倫上周出席國會聽證會時，重申六月前難加息，同時繼續為加息鋪路，講明經濟持續改善的話，儲局將會撤回有耐性加息呢個未來兩次會議唔加息的措辭，但暗示此舉旨在增加政策彈性，幾時開始加息最主要睇通脹和就業。
總括而言，市場覺得耶倫立場偏鴿，加上希臘可苟延殘喘多四個月，歐美股市上周輪流破頂，其中德國股市更衝到上11400，今年短短兩個月就累升16%，風頭一時無兩。相反，當日美國經濟數據麻麻，觸發美股三大指數借勢回吐。
滙市方面，美滙指數上周雖然上升了1.1%，但其實主要是兌歐元、日圓和瑞士法郎等與避險消息敏感度較高的貨幣較有睇頭，兌其他貨幣就麻麻，主因市場近期缺乏推升美元的催化劑。正如上述所講，美國上周五出爐的經濟欠佳，尤其喺二月芝加哥採購經理指數由一月的59.4跌落去45.8，較市場預測的58.0差一大截，加上去年第四季GDP增長向下修訂至2.2%，個人消費增幅亦遜預期，都係美元兌各主要貨幣榮辱互見的原因。
阿爺減息 澳洲或焗跟
歐元上周雖跌穿1.12，低見創一個月低位，但希臘短期免爆煲，再沽唔值博，萬一歐央行行長德拉吉周四議息後唱好，淡友隨時被挾，除非美國二月就業報告超勁，歐元下試1.1098美元的逾十一年低位機會唔大，短期可博反彈。阿爺上周六減息後，澳洲央行周二會否焗跟惹關注。
奇兵
本欄逢周一刊出