奧斯卡頒獎禮係每年一度嘅荷李活大騷，全球有幾億人收睇，充份反影荷李活霸權唔在講，亦都係美國軟實力霸權嘅示範表演。二十年前左丁山第一次聽到有中國媒體人發出豪言壯語：「要建立一個體系挑戰CNN霸權，不能讓英語媒體壟斷世界新聞、文化及生活之報導與詮釋權。」眨吓眼二十年過去了，上述豪言仍是空談，中文媒體並無寸進，除咗用多咗互聯網之外，總水平（包括文字及採訪嚴謹性）其實仲下跌咗。中國空有一個十三億人媒體市場，但有一個無處不在嘅大阿哥日日虎視眈眈，監控無處不在，言論自由與創意受到扼殺，文化電影媒體確實係難以進步到同美國競爭嘅。
呢晚睇奧斯卡，除咗舞台，佈景，燈光，節目編排等製作技術花巧，因為有錢就得，可以偷師模仿之外，內容（content）方面，中國以至整個亞洲，確實難以做得到，例如：（一）Sell女權，最佳女配角梅翠荷亞雅琪致謝詞時講爭取美國男女平等，同工同酬，台下成班女星起哄，舉手支持，包括大明星梅麗史翠普在內。
（二）Sell國際性：頒最佳外語片獎俾波蘭，又頒成就獎俾日本漫畫大師宮崎駿。
（三）Sell移民福利，最佳導演艾力謝洛依拿力圖提到希望美國人民尊重墨西哥移民。
（四）Sell溫馨，由梅姨（夠晒老資格）代表，上台主持向去年逝世之荷李活電影人致敬環節。
（五）Sell懷舊/集體回憶，Lady Gaga出場，以為佢會以前衞裝扮唱21世紀狂野流行曲㖭，誰知佢竟然着到密密實實，唱「仙樂飄飄」，左丁山正想話有冇搞錯呀，眼前一亮，五十年前嘅電影主角茱莉安德絲以80歲高齡現身台上，雍容優雅，方知道奧斯卡係向呢套不朽名作The Sound of Music面世五十周年致敬，左丁山為之拍案叫好。
（六）Sell民權人權自由，最佳歌曲Glory由兩位黑人歌手演唱，歌詞動人，音調有力，必定會成為經典之作，五十年後奧斯卡仍然會唱。歌手西蒙斯致詞時提到香港人上街抗議爭取民主，顯然係受到雨傘運動影響，令香港觀眾叫好。
以上咁多元素保證難以在任何一個中國電影頒獎禮出現，原因非常簡單，黨委書記無處不在，不能讓西方價值觀侵害當代中國。