雖然被特首梁振英打壓，問責班子更被梁振英「禁足」，但係民主黨上周五舉行嘅廿周年黨慶兼籌款晚會，未有受到影響，最終籌到三百幾萬，仲多過十九周年。最令民主黨喜出望外嘅，其實係患難見真情，喺打壓中知道邊啲係知心友。
傳出梁振英唔畀問責官員去民主黨黨慶後，據聞民主黨中人私下收到唔少問責官員短訊表明無奈，希望多多包涵；而唔理禁令、早前明言會出席嘅房屋及運輸局局長張炳良，臨時「被安排」喺當日視察港珠澳大橋，據聞有電子傳媒想跟去採訪都唔畀。點解咁鬼祟？大家應該心照。花生友聽聞，張炳良有對突然缺席同民主黨耍冧，唔少人寄予無限同情，無乜嬲佢甩底。
飛哥：梁振英太小器
食物及衞生局局長高永文突然放假，唔使問都知乜嘢事。眼見個個局長都要以唔同理由避席，有民主黨人都話唔知好嬲定好笑。當然最夠吉士嘅，要數行會召集人林煥光同審計署署長孫德基，尤其孫德基喺上周四仲話要睇吓時間安唔安排到，大家估佢梗係唔到啦，點知最後卻送上驚喜。花生友仲聽聞，有個海關助理關長都有低調到場，仲話代表關長致賀㖭呀。
有民主黨人仲透露，曾任明報企業主席嘅于品海不忿梁振英打壓該黨而亮相，立法會主席曾鈺成亦喺杯葛令傳出後應承食埋飯先走。花生友寫到呢到，只諗起當晚貴賓李鵬飛一句：梁振英太小器嘞！
花生友