預算案建議搞美食車確有驚喜，但創意零分。喺新蒲崗等嘅工廠區，已經有類似美食車出現，佢哋賣早餐或者賣飯盒。呢類送餐貨車因為屬無牌經營，所以開檔要打游擊。
今次香港可以攞正牌搞美食車，有人擔心只有集團式食肆得益。明白嘅，想做美食車檔主，首先係要有架車。香港一架二手貨車，講緊最少十萬蚊，仲未計改裝、煮食架生同其他雜項開支，難怪有飲食界人士話不如將筆錢去租間舖開檔好過。
今次美食車嘅經營方法向歐美取經，其實美國嘅美食車問題天天都多。《經濟學人》舊年四月講過，紐約限制美食車發牌數量，但個個爭住做，結果美食車牌被炒高，黑市價幾千蚊美金。美食車停泊點亦多爭拗，餐廳商戶又嘈，話免租金負擔嘅美食車搶客，搞到生意少咗。其實做飲食生意好似起步容易，但要守得住難度都唔少。參考外國調查數字，平均每一百間新餐廳，兩成五做一年就執笠；另有六成新餐廳，做三年左右亦難逃結業厄運。
所以，香港美食車都係聽住先。港產小食王咖喱魚蛋係咪會上到美食車，泊喺中環海濱長廊……就突然諗起港產片《食神》其中一段對白，「魚蛋冇魚味，但係你為咗掩飾，特別加咗咖喱汁，想將佢整成咖喱魚蛋……好好嘅一粒咖喱魚蛋，俾你做到嘅係，既冇魚味又冇咖喱味，失敗！」
C+B
本欄逢周一刊出