雷神即係雷神，呢日進擊第七場2000米國際一級賽香港金盃之前，在較早場次已揸住三win在手，結果佢同最佳拍檔摩廐鎮倉寶「威爾頓」都冇令各方失望，留前鬥後再次一攻而破，呢匹香港馬王一口氣連贏香港盃、百週年紀念銀瓶及香港金盃三場分級賽，新世代馬王地位牢不可破，總獎金更加上升到4,800萬，成為半億良駒，跑完第七場雷神已經四喜臨門，騎師王提早派彩。
早前三冠大賽頭關董事盃由摩、東廐包辦四重彩，次關香港金盃情況差唔多，摩廐「威爾頓」1.8倍大熱win無驚無險順利開出，東廐馬吳婉芳老公胡家驊愛駒「喜蓮巨星」後上跑第二，另一東廐馬「將男」拉士嚴重塞車，望空之際為時已晚只得季軍，否則有機會同馬王串Q，不過已經比董事盃梗頸四有進步。
至於前馬王方廐「軍事出擊」早段係威係勢，末段鬥落卻唔多，只跑第四保住四重彩，連勝兩年香港金盃後，終於斷纜。「威爾頓」八戰分級賽七勝，成功為月尾出征杜拜造勢，到時會喺杜拜世界盃賽日，夥拍雷神出戰路程2410米草地杜拜司馬經典賽。