新年未過，大家行吓商場都應該會見到舞獅（圖），好彩嘅話更加會見到上梅花樁，如果見到真係要停低睇睇支持，皆因你以為跳吓跳吓好容易，但原來步法非常複雜，上落樁都要兩人高度合作，至少要有數年功夫先上得大台，因為任何行差踏錯，一則受重傷，二則唔吉利，以後仲邊有人搵你隊獅先？
同姜氏獅隊主持人姜師父有數面之緣，提及舞獅運動，就會講好多行內知識我聽。原來舞獅乃非常高深之傳統運動，涉及好多宗教禮儀，禁忌亦多籮籮。好似採青咁，你以為好似Office老闆房天花板吊棵生菜掛封「老毛」咁簡單？原來以前有一樣叫「椰子青」，真係有個椰子放上面，舞獅頭者要用手劈開，絕對考功夫。未算，「蛇青」都有，不過係用道具扮蛇，但師父見過有人用真蛇做青，真係要有膽有功夫至拆得掂。唔同行業亦有唔同青，原來漁民會有用個木桶裝住條鯉魚，之後舞獅者要踩上木桶舞一輪再採「魚青」，由於地面濕滑，又要舞動獅頭，所以亦係高難度動作。
有個別麻煩人士，專門整啲超高難度嘅青陣，而且係超越常理嘅，師父通常都會拒絕，但原來舊時好多武館人因為呢啲嘢講手，因為算係借故找麻煩。現時舞獅運動已經現代化，好多小朋友都有學呢樣國技，可以練體能之餘，仲要合群守紀律，家長不妨考慮吓。
文：梁栢堅
填詞人+彩池人