新一季日職聯賽喺下星期就開鑼，上周六先上演前哨戰日超盃。上年三料冠軍大阪飛腳，由宇佐美貴史同埋巴西外援安達臣柏德列喺下半場各入一球，以2:0擊敗浦和紅鑽奪標。
幾隊日聯球隊喺上周中嘅亞冠盃首輪分組賽表現都麻麻哋，四支參賽球隊加埋只係得一和三負嘅成績，輸波球隊包括有份踢呢場日超盃嘅大阪飛腳同埋浦和紅鑽。飛腳喺呢場波形勢唔算太好，無論控球率同射門次數都唔及紅鑽，但勝在把握力夠，全場四次射門命中已經入到兩球，先由宇佐美貴史喺六十七分鐘先開紀錄，去到補時四分鐘由柏德列奠勝。飛腳亦贏得三千萬日圓（約一百九十四萬港元）冠軍獎金。
宇佐美減肥即入波
宇佐美貴史喺季前進行地獄式減肥，喺日超盃即有入球作為回報，佢喺賽後話：「入到波梗係開心，但最重要梗係飛腳贏到錦標。至於我個人目標嚟講，都希望可以喺日聯爭取成為神射手。」
喺周末新一季日聯開波之前，飛腳同紅鑽仲要踢多場亞冠分組賽先，分別係作客FC城南同埋主場迎戰布里斯班獅吼，又睇吓飛腳可唔可以乘勇開齋；紅鑽會唔會繼續冇態。
識睇，一定係睇足英台【英波Live】：
http://soccer.appledaily.com
http://bit.ly/engballlive