球迷客機終於出發，同以往出埠睇波嘅最大分別，係不嬲做開孤獨精，就算係開工mode加埋攝製隊人頭都未必夠踢七人賽，今次就人多到夠組七隊十一人踢波。
同團友做吓小統計，原來有多過一半嘅朋友係第一次飛去英國，而大部份都係準備第一次入場支持愛隊，咁大家要作好心理預備嘞，因為朝聖呢味嘢，係會上癮嘅！帶你去過第一次，之後你自己識路，就會得閒返去探吓親嘞。
做體育媒體嘅朋友最幸福其實就係出外睇比賽，但係撇除大大小小嘅幸運工作經驗，真係自食其力去朝聖嘅記憶係非常之糟糕。話說十年有多之前，有次歐洲工作之後有幾日時間free，嘩咁啱有英足盃八強踢喎，又咁蹺韋斯咸有份，於是立心飛去趁熱鬧。第一次比賽日去到愛隊球場，最震撼嘅唔係比賽有幾激，而係發現原來有咁多人同你一樣taste，原來成街着住同一間球會嘅波衫係一件好有歸屬感嘅事，全部都係自己人嘛！
咁嗰次去到烏普頓公園球場門口，由於已經係八強，仲要係遇着熱刺，當然係絕早爆滿，惟有博吓黃牛黨，問咗兩三個價，都係一百鎊，喂，張飛面價二十鎊咋喎，唔制！一於奉行細個睇《賣桔者言》嘅理論，唔好急，啲桔到天光唔使錢仲分分鐘有得執，咁就一心等到開波先啦，果然當場內傳來開波哨子聲時，門口仲有位失意嘅黃牛黨，咁我一面得戚埋去諗住嚟個大殺價，點知未開聲佢已開口：「一百鎊，照舊！」 吓，咁都仲有得企硬？算數，結果去咗球場邊嘅酒吧，同一班寧願用一百鎊買啤酒嘅fans一齊睇住韋斯咸輸波。
又過咗好幾年，又係英足盃，今次韋斯咸入決賽，真係幾十年冇幾可，於是把心一橫book機票，今次唔想又受黃牛氣，決定搵位圈中人左搭右搭，結果搵到位唐人街大廚：「一張好難搵㗎喎！不過都有嘅，二百五磅啦！」一票難求，慘過借錢！「到咗打畀我攞飛啦。」「好。」一落機就即刻打畀佢問地址交收，「你張飛賣咗畀人呀。好價呀！」「吓，咁我點呀？」問多咗，因為波飛面前，人人平等，感情免問。結果，我去返同一間酒吧，同一大班入唔到場嘅失意朋友，睇住韋斯咸又輸一場。
文：KEYMAN
節目主持