澳門馬會呢日喺氹仔馬場上演羊年首次賽事，入場馬迷獲財神同靚女派利是及賀年糖果，一班馬會高層喺頭場開跑前，先舉行拜神儀式，祈求人馬平安。除此之外，又喺馬場燒炮杖，寓意羊年旺爆，當然唔少得嘅係舞獅表演，班高層親自點睛，令場內充滿新春氣氛！
賽事方面，韓籍練馬師徐錫範先行羊運，第一、二場連勝「金色精選」及「永恆」打響頭炮，頭場更包辦馬房Q。而全日重頭戲二三班1200米民政總署賀歲盃，馮耀正訓練的「勇敢熊貓」對上三場全跑第二，今仗再用普健士，被捧成1.9 倍大熱，結果末段發力一攻而破，順利贏馬捧盃補數，當中馮耀正更是季內首勝盃賽。賽後一班馬會高層主持頒獎儀式，而民政總署代表，亦向澳門馬會CEO李柱坤致送紀念品。
李柱坤其後接受訪問，佢話好滿意呢日賀歲賽氣氛。被問到一批澳門拍賣馬嘅情況時，佢話批馬大概5至7月可上陣，今後拍賣馬將會成為澳門馬主流之一。李柱坤又補充好希望3月8日沙田馬場澳門馬「新品威」，可為澳門隊重奪港澳盃。