禮拜日(3月1日)貝湯美獲邀來港替「活力歡騰」執韁角逐香港金盃，睇番Tommy仔近兩季六次來港客串一天，其中五次都有策摩廐馬於分級賽以外場合勝出或上名，證明大摩好識把握機會玩「摩術」，利用呢位澳洲同鄉出擊。
今次一批起用貝湯美之摩廐馬，都有留意必要，當中「再出奇」同「花月流星」分別有保護權及王牌在身，戰意更加鮮明。
第六場「再出奇」來港前三捷都係贏1393或1400米；來港後兩戰，初出1200米路短都第四輸唔夠一身位，上仗1400米羅理雅人馬角力才落第，呢鋪揸住保護權，換上騎功更強之Tommy仔，勢必可幫馬主開齋。
至於第九場「花月流星」由摩廐超級粉絲包大偉擁有，呢位資深馬主季內暫時只憑「風花雪月」贏過一場，當然唔夠喉；上次初出1000米直路賽拉士追得似模似樣輸近，今次打王牌增程二百米換Tommy仔，睇怕係時候贏馬。