位置唔係正前鋒，而又可以做到成個聯賽神射手嘅，除咗西甲嘅美斯同C朗，原來洛賓喺德甲都得。呢位荷蘭國腳上周五喺拜仁慕尼黑創會一百一十五周年嘅日子，頂入一球助球隊主場4:1大破科隆，以十七球喺聯賽射手榜繼續領先之餘，仲要刷新埋個人職業生涯單季聯賽入球紀錄，我求大俠對年屆三十一歲仲咁有活力嘅佢，真係要寫個服字！
十七球破聯賽入球紀錄
洛賓喺迎戰科隆前，已經追平咗自己首季（二○○九至一○球季）加盟拜仁嘅十六個單季聯賽入球紀錄，球季仲有成兩個幾月，賽前已經一致睇好佢可以破自己個紀錄，結果都唔使球迷再等，真係話破就破。拜仁喺上周五主場迎戰科隆，咁啱亦係球會創隊一百一十五周年嘅好日子，洛賓喺六十七分鐘接應拍檔列貝利左路嘅底線傳中，遠柱頭槌頂入，連續第五場聯賽都有波入之餘，仲將個人聯賽嘅入球數字增添至十七個，成功刷新自己嘅紀錄。
謙稱紐亞表現更勝自己
除咗入波，洛賓呢場仲貢獻兩個助攻，包括舒韋恩史迪加開紀錄嗰球頭槌，就係接應佢喺左路開出嘅角球；而羅拔利雲度夫斯基幫球隊埋齋嗰球，又係佢喺禁區輕鬆挑過對方門將，等呢位波蘭籍隊友喺門前做件最輕鬆嘅事，用心口撞入，所以呢場波賽後要揀最佳球員，非洛賓莫屬！不過，佢賽後就話呢場波最光芒四射嘅唔係佢，而係紐亞：「我哋好早領先兩球，但之後又俾人追番一球，如果唔係紐亞救咗對方幾個射門，我哋可能已經被追和。」
當然，紐亞好重要，但洛賓嘅入球，為球隊將比數擴大到3:1，係鎖定勝局嘅關鍵。洛賓曾經俾人批係早熟早殘型，尤其佢離開車路士轉投皇家馬德里後，表現唔係好突出，之後喺○九年再轉投拜仁時，好多人都覺得因為佢狀態下跌，加上皇馬當時又簽咗C朗同卡卡，所以將佢賣走。不過，佢喺拜仁嘅演出，令好多人大跌眼鏡，每一季都有進步，越老越可愛，前季仲幫球會喺歐聯封王；雖然佢有時都係戒唔到獨食嘅個性，但就比過去全面咗好多。我諗𠵱家連皇馬都有啲後悔賣得平咗，當年拜仁只係用咗大約二千五百萬歐元，就簽到佢返嚟；以佢呢幾年嘅表現，畀多一倍都值。
識睇，一定係睇足英台【英波Live】：
http://soccer.appledaily.com
http://bit.ly/engballlive