【本報訊】走過漫天玫瑰花瓣，愛情之路，是甜也是「痛」。歌星周杰倫月前迎娶昆凌，接受訪問時深情剖白，提起某次強直性脊椎炎發作，身體痛到不能行，最脆弱時，想起女方默默伴在身邊，下定決心互定終身。同樣患病的李國光，說自己的愛情剛好相反，「大歌星因與女友共患難，覺得娶得過，我老婆就慘啲，結婚第一年，生下大仔我先發病」。可幸，太太沒埋怨「貨不對辦」，還以行動見證患難愛情，不離更不棄。
記者：呂麗嬋
李國光與潘慧敏，似足歡喜冤家。相約在八十年代約會勝地尖沙嘴五支旗杆，甫見面，互相「腰潤」的獨特相處方式，真情流露，「你問佢啱嘞，佢最好記性，千奇唔好得罪佢」、「係囉，你最好唔好俾我捉住痛腳」。中四認識，拍拖五年，廿二歲結婚。初戀成功，二十出頭，已認定這個她，「我就係鍾意佢個人夠爽，咩都笑一餐，患病無人想，但我從冇問點解，知道問都無用，既然逃避唔到，不如笑住面對」。
無力抱起初生兒子
有人陪着他「笑住痛」，笑笑鬧鬧，「感覺不似病人」，好多了，「老實講，我覺得我老公叻過周杰倫，痛咗咁多年，佢從冇呻一句」。收起笑容，潘慧敏舉起大拇指，由衷敬佩丈夫。早於九十年代，屬免疫系統失調的強直性脊椎炎，還未被廣泛認知，結婚不久，做貿易工作的李國光，腰脊在毫無預兆下疼痛難當，發病那年，兒子剛好出世，連幾磅重的粉團小人兒都抱不起。
「好似突然俾個鈎扯到一下，痛到行唔到，嗰時住觀塘，喺中環返工，正常人行條石板街十分鐘唔使，我行足一個鐘，痛到標晒冷汗」。面對無名病痛，小倆口惶恐不安，看遍脊醫中醫推拿骨科醫生，接受無數檢查，病情一直未見好轉。潘指，「嗰時已經好嚴重，只要一病發，連唔小心掂到佢，都會痛到大叫」。試過病發時晚上痛醒，又試過痛到要坐輪椅代步，長期與止痛藥為伴。
「痛係好抽象嘅感覺，就似啲人話生BB係女人最痛，男人唔會明白一樣」。有苦自己知，有患者未及確診，已患上焦慮症。拖拉七年，習慣了忍受劇痛的李國光，脊骨隨病情加劇開始變形，出現前傾情況，「情況時好時壞，未結婚時我高過太太兩吋，𠵱家仲矮佢少少」。痛苦難當，排期看政府的骨科醫生，這次病徵明顯了，終於確診患強直性脊椎炎。
李國光稱，「有人話係遲了醫治，但我當時只係覺得：終於知道咩事，鬆咗一口氣」。「好多病友都有相同經歷，以前連啲專科醫生都意識唔高，以為係一般腰痠背痛，猛開止痛藥就算」。
積極幫助其他患者
身受其苦，確診後兩夫婦積極參與病友會活動，分享求診經歷，「之前周杰倫因為呢個病，申請豁免服兵役，屢次被外界質疑，某程度都係源於好多人對呢種病唔認識」。
李國光說：「我希望我嘅經驗，可以幫到其他人及早對症下藥，唔使好似我咁，辛苦咁多年，連累埋太太一齊受苦。」總說愛情是一個願打一個願捱，套用在小倆口身上，卻出奇甜蜜，信不信由你。