拜得神多自有神庇佑？數周前告達理馬房酬神，翌晚大告即在谷草賽事贏「歡喜」，呢日(28日)告廐又喺馬房拜神，祈求羊年頭馬節節上升。出席馬主唔少，包括「精壯神駿」嘅袁仕傑、「時尚風華」嘅黃振南、「金鎗俠」嘅陳家樑、「你知我心」嘅鍾約瑟等。至於出戰周日(3月1日)賽事嘅姚廐馬「樂在其中」，馬主方潔儀正是鍾約瑟太太，亦有嚟拜神，希望搏殺順利。
騎師方面，備受告達理支持嘅華將呂卓賢當然有出席，而郭能就更加捧場，帶埋太太及三位年幼兒子一起到場。可惜告達理大仔Trevor身在新西蘭練馬，媽咪名下愛駒Mighty Maverick呢日就喺當地一場三級賽跑第三。
不過講到焦點，始終係告達理嘅準新抱、大告細仔Martin嘅女友Paris陳穎，原來咁啱今日係Paris生日，呢位新抱仔認真聽教聽話，生日都冇周圍去，喺馬房幫未來老爺奶奶招呼馬主，又同郭能嘅囝囝玩得好開心，雖然Paris仍是少女，但已顯得母愛滿瀉，睇嚟將來都有機會同大告生番幾粒乖孫。
至於生日願望同慶祝活動，Paris坦言冇得二人世界，因為晚上將出席告廐開年飯，佢亦好識做，表示生日願望除咗希望自己永無皺紋之外，最重要係告廄中人贏多啲馬，又祝福周日第六場「包勝」可以突圍而出。咁識賣口乖，難怪大告一家都錫晒Paris。
講番「包勝」，至今四戰全入前四名演出準，上仗1200米喺杜滿萊胯下坐包廂受困屈居亞軍，今仗增程跑1400米兼強配雷神，告達理話明更合腳法，睇嚟Paris希望「包勝」贏馬呢個生日願望，好快可以實現。