星期一晚回家吃飯，成家人坐定定睇奧斯卡頒獎禮重播，無綫明珠台八點幾就開始，NOW嘅110頻道（HBO HD）就要在九點鐘，但HBO重播並無廣告，一氣呵成，到咗十點半左右，兩個台都幾乎同步出現同樣鏡頭，過往左丁山好少有咁好心機睇奧斯卡嘅，但因為中午時份已知道最佳歌曲合唱人/得獎者致謝詞時提及香港，又聽聞得獎歌Glory非常動聽，故此特意與睡魔對抗，一路頂住要睇到佢地攞獎。
睇睇吓明珠台，廣告時段突然出現褚簡寧（Chugani ）身影，乜佢唔係亞視國際台嘅台柱咩，點解在無綫出現？哈，次日星期二中午，吃過公關大姐大之公司開年飯，漫步大馬路，就在德己立街娛樂行門前見到褚簡寧背影，連忙喝住：「Michael」，佢轉身一望，與左丁山握手，講完恭喜發財，立即單刀直入問佢：「係唔係亞視冇糧出，你要跳槽？」米高用純正廣東話答：「唔係呀，亞視歷年對我好好，我對亞視好有感情，但亞視冇事先通知我之下，將我個節目Newsline換咗新主持人，我要等記者打電話嚟查詢，我先至知道有咁嘅事，我向亞視負責人交涉，乜結果都冇，唯有無癮鬆人啦。跟住無綫有人搵我斟介，叫我簽約，咪由大埔走去將軍澳謀生囉。新節目叫做Straight Talk，中文譯做『清心直說』，由三月三日開始逢星期二晚上九點在明珠台播出。」
哦，原來如此，褚簡寧認真唔話得，亞視冇糧出，佢仍然肯同亞視捱落去，直至到俾人飛走為止，睇怕佢都係亞視債權人，可以追討欠薪咯。照左丁山睇，無綫收視率更高，褚簡寧個明珠台新節目應該會比以前更有影響力，正是塞翁失馬，焉知非福，雖然俾人飛走，心裏不舒服，但正因如此，方可做良禽擇木而棲，老襯者，唯舊主人而已。傾傾吓，見到港大校務委員會主席梁智鴻醫生行過，褚簡寧立即發揮記者本色，捉住梁醫生問：「今晚港大學生會示威，究竟你會點？」梁主席話：「物色委員會都未推出副校長（學術及資源）推薦人選，我無法評論，總之一切按港大規矩辦事，校委會有21人，平時好獨立，幾難受外界影響㗎。」陳文敏一事，弄得港大滿城風雨，無端端政治化到極，又有人自爆到廉署投訴陳文敏，真係唯恐天下不亂，實不知有何居心。