恭喜恭喜！陳豪和陳茵媺前日宣佈細仔已出世，陳豪昨日往嘉諾撒醫院接老婆出院，與傳媒分享喜悅。二人全程十指緊扣，陳豪應記者要求輕吻太太，恩愛之情認真羨煞旁人。對於大家的祝賀，他們兩人異口同聲表示感謝，茵媺表示大前日早上作動， 花了五小時以順產方式生下細仔，並說：「今次比上次辛苦同痛好多，但係今次快啲，BB重六磅十三安士，似爸爸多啲，好英俊，好Man。」
漏口風追個女
問到BB的名字？陳豪與茵媺齊聲表示說：「英文叫Nathan Lucas Chan，Nathan係代表上帝賜畀我哋嘅禮物，Lucas係希望小朋友發光發亮。」不過哥哥Aiden暫時未見到弟弟：「佢得十四個月，我哋入院前有叫醒佢，話媽咪要入院，細佬應該要出世，佢都手指指。」
已有兩子的陳豪，問他會否想追多個時，他爽快地表示會並問太太，聽見茵媺附和後，兩人即哈哈大笑。笑問會否立即趕工追女？陳豪即攬着老婆說：「佢好辛苦，等佢唞吓先，小朋友係上天賜畀我哋嘅禮物，我哋冇理由唔要，尤其𠵱家呢個時候，小朋友係一個好好嘅喜悅，所以多啲嚟密啲手。」
落力賺錢養家
有仔萬事足，陳豪被問會否不捨得離開兩子去工作？他笑說：「唔會，反而更加畀心機做嘢，變咗係我哋嘅原動力，更加要做好啲。」問陳茵媺幾時復出拍劇？她說：「遲啲喇，我都好想見證小朋友長大嘅過程，不過我好鍾意拍嘢，希望兩樣可以一齊做。」至於細仔中文名，他們說：「遲啲再改，我想同哥哥有啲唔同。」而傍晚時分，茵媺在微博貼了細仔的相片，她留言表示二王子已經誕生，做媽媽是她一生最勇敢和最難忘的經歷。
採訪：張俊銘
攝影：陳俊強