「兒夜姨野以夜兒野~」係咪已經聽到聲呢？宇宙巨G.E.M.鄧紫棋就是憑住這幾個字紅到出太空！她隨時隨地何時何地的飆高音歌唱技巧，「叫」醒了強國樂迷的心，但香港人似乎被嚇親。古巨基、林二汶與Robynn & Kendy亦分別參加過內地歌唱節目，他們選用「唱歌不叫歌」的方式，最終全軍覆沒。到底飆高音是否等同唱得好？反觀加入樂壇十二年的李逸朗，最近憑着震撼人心的哭腔版《儍女》跑出，日前更街頭獻技，沒有飆高音的他仍然好受街坊歡迎，至少人人爭住集郵。
撰文：盧妹、溫敏芝
叫歌的「潮流」拜宇宙巨G.E.M.所賜，但當飆高音來得太頻繁，實在失去震撼的感覺，換來是「可唔可以畀我唞吓」的疑問。飆歌是否等於好勁？唱歌肯定不止這種方法，李逸朗的哭腔《儍女》網上瘋傳，好聽與否見仁見智，但人氣急升是事實，現在人人都識李逸朗。日前，他分別去到紅館、旺角花園街及花墟垃圾房外，以獨特的歌唱技巧清唱大碟《Fly me to the earth》的翻唱歌《唯獨你是不可取替》。紅館是歌手的目標與夢想，宇宙巨G.E.M.十九歲舉行的紅館個唱，而蔡楓華卻等了三十一年。雖然李逸朗暫時未有屬於他的紅館個唱，但那天站在紅館外的他高歌激昂版《唯》，放低聲淚俱下的演繹方式，只是在歌曲末段稍稍拉長音節，完美得分。李逸朗：「紅館？睇人打排球同自己打羽毛球就去過，呢度係每個香港歌手嘅夢想，雖然段路仲有好遠，但係終有一日我會去到。」
垃圾站外重演哭腔
離開紅館，李逸朗到花園街獻唱甜蜜版《唯》，圍觀的師奶、大叔、阿哥、阿姐紛紛用手機影相、拍片，完成拍攝後更排住隊集郵，其間師奶甲說：「呢個咪《十兄弟》嗰個李逸朗囉！」花店售貨妹妹大叫：「《儍女》好聽呀！」大叔用手機邊影邊說：「李逸朗呀！」最後一站──垃圾站，李逸朗更拿起大掃把扮「掃街茂」，又踎街重現哭腔臉唱悲情版《唯》，投入度滿分。
街唱完畢，李逸朗說：「好開心，係好好玩嘅嘢，唱嗰陣唔好介意人哋點睇，以前拍MV都試過喺街咪嘴，不過拎埋支咪真係未試過。」問到飆高音的叫歌技巧，例如是宇宙巨G.E.M.的唱腔？他自嘲不是高音歌手：「我都渴望可以飆高音，不過我飆唔到，人人都想唱海豚音啦，我會欣賞。」提到內地的飆高音文化，李逸朗原來亦參加過內地歌唱比賽，亦擔任過評審：「唔係越高音就係冠軍，咁唱低音嗰啲人點算？唱歌係藝術，內地歌唱比賽係綜藝節目，大家睇得開心、享受就得，唔使認真。」
基仔鍾意阿菲歌喉
下月將再度現身《我是歌手3》復活賽的古巨基，日前受訪被問到是否拒絕飆高音而輸？他說：「我係想揀啲對我有意義嘅歌，帶住自己嘅心事去唱，冇理人哋。有部份人係會鍾意震撼性聲音，要視乎現場嗰五百個觀眾。」是否首首歌都可以狂飆？向來是假音王的基仔指要視乎歌種：「以我經驗，有啲歌真係唔適合，初學者如果要好激情咁用聲，可能會整傷喉嚨。」對於狂飆G.E.M.的叫歌技巧，基仔說：「我有聽過佢啲歌，其實我鍾意聽阿菲（王菲），唱得好晶瑩剔透，即係有人鍾意食甜啲、有人鍾意食清啲。」