造型師馬天佑（Kevin Mayao）大前年於London College of Fashion的Fashion Promotion畢業，回港後自組公司，一所由零開始，到現時擁十六名員工的製作室，兩年間成功把夢想鑄成事業……Mayao天馬行空與浮誇的造型，深得各界認同，原來他買衫也有癖好，愛浮誇又要行，每件「珍寶」背後也有它的故事，就像他的個性一樣，非常好玩。
撰文：羅慧敏
馬天佑是個二十六歲的淘氣大男孩，似有用不盡的精力，拍攝當日他跟助手帶了數篋衣飾，拍攝之餘亦一邊爭取時間開工替人搞造型。其實Mayao以前從來不愛fashion，卻偏偏當上現時紅極的造型師，提起他與衣服的故事，他興致勃勃，Mayao說：「細個嘅時候已經好鍾意倫敦，所以喺嗰度揀一科（Fashion Promotion）嚟讀，嗰陣完全唔鍾意fashion，我二十三歲畢業，二十二歲先鍾意呢樣嘢，有一日個朋友叫我去咗間select shop，叫feathers，佢叫我試咗件Gareth Pugh嘅女裝皮褸，當時我覺得好奇怪，着咗件褸上身真係超驚訝，由嗰一秒開始，自己就鍾意咗浮誇，以前我只係會買CD唱片，但自始自己就好似變咗另一個人。」
服裝浮誇似建築物
Mayao喜歡接觸不同的新事物刺激自己的創意，到世界各地尋找自己喜歡的心頭好，也是他激發創意的來源之一，他說：「我鍾意以好玩嘅心情做嘢，去到唔同地方，我都鍾意去不同嘅舖頭，搵一啲唔易搵到嘅衫，浮誇嘅衫感覺好立體，好似建築物、起樓咁，我亦都鍾意顏色。」
Mayao珍藏的浮誇服裝中，件件都是笑中有淚，每件服裝背後的故事引人入勝，Mayao越講越興奮：「真係每一件都有佢哋嘅behind story，有開心嘅、有驚喜、有震撼嘅，真係超級驚喜。」有幾驚喜？我們且來看看。
髮型：Sing of O4 Hair Salon
場地提供：O4 Hair Salon
【去二手店越亂越開心】
Mayao拿手造型設計，周杰倫、張惠妹、何超盈等，都曾經被Mayao「塑造」過。Mayao自認好彩，因為工作，他能夠輕易得到時下最新的時尚資訊，滿足之極，其實到二手店「執到寶」才是Mayao的癖好，他說：「香港好多好嘢可以搵到，必列者士街嘅select 18同普慶坊嘅霑記，我都成日去。」而去到世界各地工作，Mayao總有收穫，他說：「其實大家見到越亂就越開心，見到咁亂千祈唔好驚，唔好嚇親，仲要鎖定目標，紐約一間好亂嘅舖，我搵到件A Wang，仲只係一百四十蚊。」Mayao還極力推介紐約的Bacon’s Closet，而倫敦的What Comes Around Goes Around與Brick Lane，至今他仍然愛去。
