教院校長張仁良貌似嚴肅，查實那些年好浪漫。教院噚日喺校長府搞新春傳媒茶敍，現場多咗位識講識聽廣東話嘅法籍靚太，原來係女主人Christine。
張太已融入香港生活，煮粵菜都難唔到佢，今年過年就煮咗羅漢齋同老公食。Christine噚日仲特登親手整蘿蔔糕請記者食，佢話係跟人學，刨咗三斤蘿蔔，再加臘腸同瑤柱，秘訣係加薑汁同糖，但唔好加冬菇，否則會易壞。
張校長同Christine撻着，都係靠粵菜。佢一九八二年到法國留學，第二年邂逅住同一幢學生宿舍嘅Christine，佢用朋友喺香港帶去嘅乾冬菇，煮咗煲冬菇炆雞請Christine食，咁就得咗。